حسام : السلام عليكم إزيك يا سلوي .
سلوي : الحمد لله - بتكمل الدرس مع إبنها محمد -
، أحضرلك الغدا .
حسام : ياريت بس بسرعة عن كدا .
سلوي : طيب ثواني أخلص باقي الدرس مع الولد - بتزعق مع إبنها علشان يحسن خطه - .
حسام بعصبية : يا ستي مش كفاية طالع عيني في الشغل كمان ما أكلش لقمة زي الناس .
سلوي : م أنا قولتلك حاضر وبعدين انت كل يوم تقول نفس الكلمتين دول هو مفيش غيرك اللي بيتعب ، أنا طول اليوم من الغسيل للتنظيف ومن الطبيخ للمذاكرة لعيالك ولا هما عيالي وحدي .
حسام : طايب يا ستي جهزي الغدا معلش .
سلوي : معلش 😕 حتي كلمة حلوة مش عارف تقول زي باقي الخلق .
حسام : يعني يا ربي مش كفاية رخامة مديري في الشغل .
سلوي : قصدك إني رخمة .
حسام : عايز أكل .
سلوي : وكمان بتتجاهل سؤالي ، أنت مبقتش حسام اللي أنا حبيته زمان .
حسام : ولا أنت سلوي اللي أنا حبيتها .
سلوي : (بوز)
حسام : (بيولع سيجارة)
انتهت
بعد ما شوفنا كمية النكد في العلاقة الزوجية اللي فاتت نستطيع أن نجزم ان ذلك يتكرر مع أحدنا علي الأقل مرة أو أكثر ، ولكني هنا لم أخبركم عن النصائح بالطريقة المعتادة ولكني سأدعكم تكتشفوها بأنفسكم ، لذا دعونا نغير بعض من الكلمات والأفعال في الحوار السابق ليتحول كالتالي :-
سلوي حالياً بتذاكر الدرس مع محمد
.لما حسام رجع البيت بعد يوم شغل رخم :-
حسام : السلام عليكم إزيك يا سلوي .
سلوي وهي متجهة إليه : الحمد لله على السلامه ( وأخذت منه الشنطة ) لحظه والأكل يجهز .
حسام : شكلك متضايقه ليه كدا .
سلوي : لا مفيش حاجه يا حبيبي .
حسام : لا أنت شكلك مضغوط .
سلوي : متشغلش بالك محمد باقيله درس علشان معاه امتحان بكرا ، بس متقلقش الغدا بيجهز .
حسام : طب هاتيلي محمد أذاكر معاه الدرس ده علي ما تجهزي الأكل .
سلوي : مش كفاية تعبان اليوم كله في الشغل كمان عايز توجع دماغك مع محمد
حسام : كله يهون علشان خاطركم ، وبعدين م انت طول النهار طالع عينك في شغل البيت ومحدش سمعلك شكوى.
سلوي : د انت مركز معايا بقي 🤭
حسام : طبعا مش مراتي وحبيبتي وكل دنيتي ، احم احم انت والأولاد طبعا .
سلوي : وكمان كلام حلو ماشي يا سيدي بس الكلام مش كفاية أنا عندي طلب صغنتوت قد كدا .
حسام : عنيا ليكي .
انتهت
طبعا مش محتاج أقول أنها لو طلبت عنيه في الموقف ده مش هيبقوا غاليين
نفس الأشخاص ......... نفس الموقف
نفس الظروف ......... نفس المبررات
نفس المشاكل والعيوب ولكن .........
اللي فرق النتائج ، اللي إعتمدت بشكل رئيسي على الكلمة الطيبة .
قال صلى الله عليه وسلم :-
(( الكلمة الطيبة صدقة ))
لذلك المزيل الفعال للنكد والهموم بين الزوجين هو الكلمة الطيبة 🌷❤️
دمتم طيبين
تعليقات
إرسال تعليق